睇電影節「賴野」次數太多啦，呢幾年終於學識左點揀，先至唔會「賴野」，揀到D 岩自己睇既戲啦！（當然，人人揀戲既口味都唔同，例如我好少睇台灣片，所以人人揀戲方法都唔同既）：
1. 謹記：千祈千祈千祈唔好單憑套戲既戲名同描述黎揀戲！你諗下，個中文戲名係D 香港人改既，同套戲係咪一定有關係？改得靚代唔代表套戲好？仲有，電影節個catalog D description 有時真係差得好離譜，越寫得有詩意寫得煽情越唔可以信！例子係當年小妹睇過一套叫「安琪拉的白色灰燼」既戲，名好聽啦，加埋戲情描述係話「似花樣年華」，作為王家衛迷，我立即衝入場，點知係一個中年肥婆做安琪拉，反胃反到完場～
2. 呢招好好用：最好唔好懶，宜家資訊咁發達，上youtube 搵trailer 望下，去rottentomatoes同imdb 查下評分，睇下出名既網上影評人有乜心水（不過通常都要開售左幾日先睇到呢D blog 出現），岩睇先揀，賴野成數又會降低啦
3. 睇住導演演員黎揀戲當然好難會錯啦，我見到賈樟柯拍既，唔駛睇描述唔駛上網查都得入場啦卦？
4. 開幕、頒獎禮同閉幕電影通常都睇得過既——雖然我都賴過野（當年果套「暗湧」堪稱為史上最想割凳電影！）
5. 文化中心上映既，因為可以俾多D 人睇，睇得過成數都高
6. 有中文字幕既都睇得過，點解？梗係預左多人睇先值得做埋中文字幕啦
7. 話明係大師，大師級梗係好大機會睇得過的
8. 奧斯卡外語片提名？康城囉獎？係某國家本年最賣座電影？某國家有史以來最好睇既電影？當然睇得過！
9. 影迷嘉年華同作者風都比較少賴野，不過都要小心D 揀
10. 回顧展當然睇得過啦，通常都真係揀過架嘛，同埋回顧得既梗係大師啦，見識下都好嘛
11. 自主新潮同世界視野因為片太多啦，容易賴野，真係幾考功夫揀
12. 加場既戲當然係睇得過啦（但係好似話今年最多人睇既「魔幻女兒國」唔係咁好睇，D 人都係俾catalog 呃左話係成人版哈利波特）
13. 如果你口味獨特，當然要睇CULT 片（中間彩色拉頁一定有精選！）同我愛午夜長啦，不過冒險度都幾高下，不過似乎我揀親都冇事，因為我都當CULT 片睇之嘛！如果唔係稍稍冒險，點會揀到我至今都津津樂道既奇片「Taxidermia」？（當然我真係冇懶，上網睇哂trailer 先入場啦）
不過，有時揀戲真係唔可以太穩陣的，賴下野都幾開心的～今年我都揀左套IMDB 評分得4.7 既「從印度到中國」睇，預左賴野，結果？幾好呀，CULT 片黎架嘛，同埋發現我幾鍾意Bollywood 呀～
我個妹揀HKIFF 都有一手既，等我下次分享佢既方法
0 comments:
Post a Comment