Cult Cult Cult！

去看電影節最好玩既係睇Cult 片，純粹娛樂，純屬惡搞，純屬瘋狂！

今年揀左兩套Cult 片睇——「風塵三俠決戰地獄門」同埋「從印度到中國」。要我評「風塵三俠決戰地獄門」其實有D 唔公平，事關我十分鍾意三池崇史既「日式牛仔一品鍋」，好多人話「日」好唔掂，不過我覺得佢勁惡搞，好Cult ，好bad taste，好肉酸，所以我好鍾意，要知道Cult 片呢味野冇得講，你可以話佢好惡搞好炒冷飯，不過我又睇得過癮呀，冇得講！當然無論劇情、場面、攝影方面，「風」都真係贏既，所有野都好完整，劇本將韓國、中國同牛仔風格fusion 埋，但係又唔古怪，場面好刺激，人物好突出，所以撇除我一心想惡搞既心態黎睇（冇法，我真係好愛讀莎士比亞既亨利），「風」係一套絕頂好睇既電影，最正當然係朴道完單臂捉住條繩用rifle 從高用槍射人啦（仲有做乜無啦啦轉rifle ？點轉到架？），型到爆！最後沙漠追逐果段都好正，沙塵滾滾，好刺激！

至於「從印度到中國」真係好爛，但係爛得黎我又好開心！劇情其實老套到暈，典型不學無術既後生仔，經過高人指導去練成好功夫，為親人報仇，玩印度同中國fusion，無端端加插D Bollywood 歌舞，成班人響長城跳舞，好肉酸既廣告，用埋哂D 國產武器（中國果然係世界工廠！），甚至出現「Intermission」字樣！搞乜呀？不過惡搞萬歲！開心完就夠啦，YEAH！